தல வரலாற்றை விளக்கும் வகையில் ஆண்டுதோறும், ராமேசுவரம் ராமநாதசாமி கோவிலில் ராமலிங்க பிரதிஷ்டை திருவிழா நடைபெறும். அதுபோல் இந்த ஆண்டும் ராமேசுவரம் கோவிலில் ராமலிங்க பிரதிஷ்டை திருவிழா தொடங்கி நடைபெற்று வருகின்றது. திருவிழாவில் முதல் நாளில் ராவண சம்ஹாரம் நிகழ்ச்சி நடைபெற்றது.
2-வது நாளான நேற்று (15.06.24 )தனுஷ்கோடி கோதண்ட ராமர் கோவிலில் விபீஷணர் பட்டாபிஷேக நிகழ்ச்சி நடைபெற்றது. காலை 7 மணியளவில் கோவிலில் இருந்து ராமபிரான் தங்க கேடயத்திலும், விபீஷணர் தனுஷ்கோடி கோதண்ட ராமர் கோவிலுக்கு எழுந்தருளினர்.
பகல் 1 மணி அளவில் கோதண்ட ராமர் கோவிலில் வைத்து ராமபிரான், சீதை, லட்சுமணர், ஆஞ்சநேயர் ஆகியோருக்கு சிறப்பு மகா தீபாராதனைகள் நடைபெற்றன. தொடர்ந்து ராமபிரான், இலங்கை மன்னராக ராவணனின் தம்பி விபீஷணருக்கு பரிவட்டம் கட்டி பட்டாபிஷேகம் செய்து வைத்தார். பின்னர் இலங்கை மன்னராக பட்டம் சூட்டிக்கொண்ட விபீஷணர் ராமபிரானை சுற்றி வலம் வந்தார்.
பின்னர், ராமபிரான் மற்றும் விஷ்ணுவுக்கும் மகா தீபாராதனை நடைபெற்றன. பட்டாபிஷேக நிகழ்ச்சியில் கோவிலின் இணை ஆணையர் சிவராம் குமார், பேஷ்கார் கமலநாதன், இன்ஸ்பெக்டர் பிரபாகரன் உள்ளிட்ட ஏராளமான பக்தர்கள் கலந்து கொண்டனர். பட்டாபிஷேக பூஜைகளை உதயகுமார் மற்றும் ஸ்ரீராம் குருக்கள் ஆகியோர் செய்தனர்.
திருவிழாவின் முக்கிய நிகழ்ச்சியாக இன்று பகல் 12.30 மணியளவில் கோவிலில் ராமலிங்க பிரதிஷ்டை திருவிழாவும் நடைபெறுகின்றது. இரவு சாமி-அம்பாள் பஞ்ச மூர்த்திகளுடன் எழுந்தருளி ரத வீதிகளின் வீதி உலாவரும் நிகழ்ச்சியும் நடைபெறுகின்றது.
